الثلاثاء، 2 نوفمبر، 2010

الساكت عن الحق

بالفتره الماضية ولاني آثرت على نفسي ان اقرأ واقرأ واقرأ ولا اكتب لسبب بسيط وهو ان البركه بالموجودين
والمدونين مو امقصرين والجرايد اكثر من الهم على القلب ،،،
ولكن بعد هالمده قدرت افهم ويا ريتني ما فهمت ،،،
طول عمري اقول بيني وبين نفسي ليش المواطن العادي اهو الوحيد اللي يشوف السلبيات والمسؤولين ما يشوفون الا الامور الطيبه ، ليش المواطن المديون يشوف البوق عيني عينك والمسؤولين ما يلاحظون اي شي ،
ليش المواطن يحس بالفتن ما ظهر منها وما بطن والمسؤولين ما يشوفون الا الوحده الوطنيه ،،،
ليش المواطن البسيط يحس بالزحمه والمسؤولين ما يدرون وين هالزحمه وكاننا عايشين في بلد منقسم فيه المواطنين بمكان والمسؤولين عايشين بمكان ثاني ،،،
عندنا مجلس امه يراقب ويتابع ويشرع ، وبالتبعيه عندنا حكومه تنفذ القرارات وتحافظ وتراقب تنفيذ القوانين ،،،،
ولكن ومن بداية مسلسل التجاوز بالهيئه العامة لشؤن القصر ما انتشر من خلال
مدونة ادراك ومدونة دستورنا سورنا ومدونة الحلم الجميل
وآنا اسال نفسي سؤال واحد ماكو غيره ،،،
ماكو عضو بمجلس الامه شاف هالتجاوزات ؟؟؟
واذا كانت هالتجاوزات منشوره وموجودة بتقرير ديوان المحاسبه عيل ليش كل هالسنين محد حاسب المسؤولين بالهيئة
اذا كان الدليل موجود ليش ما شفنا احد راح النيابه
ليش قاعدين يشوفون اللعب بمقدرات الايتام وارباحهم تتوزع عينك عينك على المسؤولين بالهيئه بدون حسيب ولا رقيب ،،،
ليش اراضي الايتام تنباع للاقربين وبابخس الاثمان وبدون غطاء قانوني ومحد تكلم ؟؟؟
وطبعا تقرير ديوان المحاسبه فيه بلاوي مو على هيئة القصر بس ولكن ملاحظاتها شملت كل قطاعات الدوله وفضحت الفساد الكبير والكذبه الكبيره اللي عايشها المواطن البسيط اللي قاعد يدفع ديونه اول باول وخايف من العجز عن السداد ، وقاعد يشوف النقله الكبيره بمستوى اي واحد يترقى بوظيفتة ،،،
وهذا غيض من فيض
وهذي مجرد هيئة وحدة من الهيئات والمؤسسات الكثيره بالكويت ،،،
ليش هذا الصمت المطبق على هالملاحظات،
هذي كلها تساؤلات بسيطه دارت بذهني ،،،
كنت متوقع ان اعضائنا المحترمين واللي عددهم ٤٩ بخصم السيد روضان الروضان كونه احد الوزراء ، كنت متوقع تحرك او سؤال ولكن محد سال ،،،
ليش تبقى مشاكل البلد ومصايب المسؤولين رهن لاوراق التفاوض ،،،
ليش كل افعالنا تعتمد على الفعل ورد الفعل ،،،
ليش ما نتحرك الا اذا الفاس طاح بالراس
آنا اجزم ان اللي نشر من هالموضوع كل اعضائنا عندهم علم فيه وما نشر الا جزء بسيط من الملف اللي بيد كل عضو ، ولكن اعضائنا عندهم حسابات وعندهم تكتيكات غير اللي عندي ،،،

ليست هناك تعليقات: