الجمعة، 24 أبريل، 2009

جريمة الورقه البيضاء

صارلي جم يوم مو كاتب شي  بس اراقب الساحه من خلال الربع والمدونات والجرايد وحسيت ان المواضيع المطروحة اهي اهي ... بو رميه طلع ... بو رميه يقرا قرآن ... الطاحوس تجدد حجزه ... الطاحوس نجح بالفرعيه ... الخرافي لابس جينز ... ابداح الهاجري اسير سكوب ... والحمد لله انهم افرجوا عنهم كلهم بالضمانات الكافيه،،،
وبعد الهدوء من الكلام عن موضة هالانتخابات اللي اهي ( اغلط على الشيوخ والاسره وانت تنجح ) وكان ما عندنا مشاكل بالمره الا هالموضوع
لا حظت ان الموضه الجديده هالسنه ...
( ورقه  بيضاء من اجل الكويت )
اعتقد ان هذي اكبر جريمه اتصير بالكويت 
اول شي بدؤوا يروجون للحل غير الدستوري ... ويوم الله ما عطاهم اللي يبون بدؤوا يروجون لمقاطعة الانتخابات ... 
ويوم شافوا ان المقاطعه ما راح اتبين انها مقاطعه وعزوف وراح اتبين انها مجرد نسبه مشاركه اقل من السابق ... بدؤوا يروجون للورقه البيضاء المقيته ...
ليش اقول هالكلام اللى راح يزعل مني الساده المدونين المناصرين للورقه البيضاء ؟
الجواب  ان بعد الانتخابات راح يوصل 50 نائب سواء بورقه بيضاء او بورقة زرقاء  وراح يوصل كل النواب اللي مجهزين قواعدهم الانتخابيه والمجيرين لاحزاب وكتل وقبائل ... اشلون يوصل صوتكم اذا كنتوا ترفضون الادلاء فيه ... اشلون يوصل رايكم اذا انتوا حطيتوه بورقه بيضاء ...
صاحب السمو الامير الله يحفظه سلمكم مسؤولية ادارة البلد من خلال توصيل ناس اتساعد على بناء البلد وانتوا تبون اتروحون واتسلمون البلد لناس هدفهم خدمة قواعدهم الانتخابيه والبلد آخر اهتمامهم ...
آخ يا بلد ... انتوا تدرون ان اكثر من نص الدائره الخامسه مو من القبايل ... ومع هذا النجاح مضمون لابناء القبائل المتحالفة مع بعض !!!
انتوا تدرون ان اصوات الجهراء اكثر من 52000 صوت ومع هذا نتيجة الجهراء لم ينجح احد!!!
آنا ماني ضد القبائل بس هذا مثال حي واتشوفونه بانهم هم من يسير الانتخابات من خلال قواعدهم الملتزمه بالانتخاب وتوصيل من يرونه مناسب لهم لخدمة القبيله وليس الكويت الا من رحم ربي وهم قله  والباقين مهمشين  ... باختصار اللي يقول ورقه بيضاء من اجل الكويت .. اخطأ بحق الكويت لان الكويت تستاهل احسن من جذيه .... والتغيير لا ياتي الا باكبر عدد من الناخبين ... ودمتم سالمين 

هناك تعليق واحد:

Yin مدام يقول...

المشكلة أخوي إن ناس وايد حاشهم إحباط
واللي نازلين نفسهم ما تغيروا لا هم ولا مطالباتهم ولا اساليبهم ولا تصريحاتهم
الوجوه نفسها ما تغيرت
وإذا وجوه جديدة الفكر البائس نفسه

بس صاج الورقة البيضاء جريمة يجب أن لا نشارك فيها


يعطيك العافية
:))